|
|
Welkom by "Die Wit Hand" ! Laat ek myself bekend stel: ek is Corné Engelbrecht en op hierdie webbladsy gaan ons Suid-Afrikaanse spookstories uitruil en geniet. As u daarvan hou om op donker, stormagtige aande die deure te sluit en op te krul met 'n grieselige spookstorie of om voor 'n knus kaggelvuur te gaan sit met 'n paar goeie vriende om te luister na stories wat die hare laat rys, skuif gerus nader !
As u met die lees van die titel van hierdie bladsy 'n klokkie, of iets dergeliks, hoor raas het, was u vermoede heel moontlik in die kol. Die titel is ontleen aan 'n spookstorie van C.J. Langenhoven, vertel deur ene Hans Tysse. Langenhoven se derde bundel in sy versamelde werke verskaf 'n goeie wegspringplek vir enige persoon wat meer wil weet oor Suid-Afrikaanse spoke.
Ek gebruik nou wel die term "spookstorie", maar daarmee bedoel ek regte gebeurtenisse. In die reël sal ek graag wil fokus op moderne Afrikaanse spookstories, maar as u van 'n ouer vertelling weet wat dalk nie so bekend is nie, sal ek ook graag van u wil hoor. Sou u lus wees om 'n stukkie fiksie aan te stuur, sal ek dit met die grootste liefde plaas, maar verwittig my tog net van die feit, omdat ek tog nie ondersoek na ondersoek kan loods om vas te stel of dit die ware Jakob of blote spekskietery is nie.
Op hierdie stadium wil ek dit beklemtoon dat ek bloot geïnteresseerd is in spookstories per se. Ek is geen voorstander van die oproep van geeste, die speel van glasie-glasie en soortgelyke duistere aktiwiteite nie. Tot dusver het ek al 'n geweldige hoeveelheid vertellinge deurgewerk op die Internet en een ding wat soos 'n paal bo water staan, is dat okkultiese bedrywighede, sonder enige uitsondering, net probleme bring. Ons verstaan nog hopeloos te min van hierdie dinge om sonder meer daarmee in te meng.
'n Ander ding wat my geweldig fassineer en baie goed aansluit by spookstories is spookfotos. Ek is oortuig daarvan dat daar in baie huisgesinne oor die land se fotoversamelings eienaardige fotos is wat hulle nie kan verklaar nie. Alhoewel VVV's nie juis verband hou met spoke nie kan ons die afdeling taamlik wyd oopgooi om byvoorbeeld ook fotos daarvan te kan akkommodeer.
As jy dan 'n bydrae wil maak of sommer net wil gesels, stuur gerus jou bydrae aan my eposadres.
